ស្វែងយល់ពីការប្រើឈ្មោះ ក្នុងអាស៊ាន

បើនិយាយពីអាស៊ានអ្នកតែងតែឮជារឿយៗនូវឈ្មោះ អាស៊ាន+១ អាស៊ាន+២ អាស៊ាន+៣... តើអ្នកមានឆ្ងល់ទេថាហេតុអ្វីបានជាគេហៅបែបនោះ?

សមាគមប្រជាជាតិអាសីុអាគ្នេយ៍ ដែលហៅកាត់ថា អាស៊ានត្រូវបានបង្កើតឡើងនៅថ្ងៃទី ០៨ សីហា ១៩៦៧ នៅទីក្រុងបាងកក ប្រទេសថៃ ដែលមានប្រាំប្រទេស ( ឬហៅថាបិតាស្ថាបនិកទាំងប្រាំ ) បានចុះហត្ថលេខា ដើម្បីបង្កើតអាស៊ានគឺ ប្រទេសឥណ្ឌូនេសីុ ម៉ាឡេសីុ ថៃ ហ្វីលីពិន និងសិង្ហបុរី។ ហើយក្រោយពីបង្កើតអាស៊ាននោះមក មានប្រទេសផ្សេងៗចូលជាសមាជិកបន្តបន្ទាប់ដូចជា៖

· ប្រទេសព្រុយណេ ( នៅថ្ងៃ ០៧ មករា ១៩៨៨ )

· ប្រទេសវៀតណាម ( នៅថ្ងៃ ២៨ កក្កដា ១៩៩៥ )

· ប្រទេសឡាវ និងប្រទេសភូមា ( នៅថ្ងៃ ២៣ កក្កដា ១៩៩៧)

· ប្រទេសកម្ពុជា ( នៅថ្ងៃ ៣០ មេសា ១៩៩៩ )។

បន្ទាប់ពីប្រទេសទាំង១០ ដែលជាសមាជិកអាស៊ាន ក៏មានឈ្មោះផ្សេងៗ ត្រូវបានប្រើនៅក្នុងអាស៊ានដូចជា៖

· អាស៊ាន+១ ៖ មានន័យថាប្រទេសអាស៊ានទាំង១០ បូកបញ្ជូលជាមួយនឹងប្រទេសឥណ្ឌា។

· អាស៊ាន+២ ៖ មានន័យថាប្រទេសអាស៊ានទាំង១០ បូកបញ្ជូលជាមួយនឹងប្រទេសញូហ្សេឡិន និងប្រទេសអូស្រ្តាលី។

· អាស៊ាន+៣ ៖ មានន័យថាប្រទេសអាស៊ានទាំង១០ បូកបញ្ជូលជាមួយនឹងប្រទេសអាសីុបូព៌ាចំនួនបីគឺ ប្រទេសចិន ប្រទេសជប៉ុន និងប្រទេសកូរ៉េខាងត្បូង ។

· អាស៊ាន-៥ ៖ គឺសំដៅទៅលើប្រទេសដែលជាបិតាស្ថាបនិកទាំងប្រាំដែលបានបង្កើតអាស៊ាន។

· អាស៊ាន-៦ ៖ មានន័យថាប្រទេសអាស៊ាន-៥ បូកបញ្ជូលជាមួយនឹងប្រទេសព្រុយណេ ដែលបានចូលជាសមាជិកនៅថ្ងៃ ០៧ មករា ១៩៨៨ ។

· អាស៊ាន-៧ ៖ មានន័យថាប្រទេសអាស៊ាន-៦ បូកបញ្ជូលជាមួយនឹងប្រទេសវៀតណាម ដែលបានចូលជាសមាជិកនៅថ្ងៃ ២៨ កក្កដា ១៩៩៥ ។

· អាស៊ាន-៩ ៖ មានន័យថាប្រទេសអាស៊ាន-៧ បូកបញ្ជូលជាមួយនឹងប្រទេសឡាវ និងប្រទេសភូមា ដែលបានចូលជាសមាជិកនៅថ្ងៃ ២៣ កក្កដា ១៩៩៧។ ដូច្នេគឺមិនមានអាស៊ាន-៨ទេ គឺដោយសារតែប្រទេសឡាវ និងប្រទេសភូមាចូលជាសមាជិកនៅក្នុងពេលតែមួយ។

· អាស៊ាន-១០ ៖ មានន័យថាប្រទេសអាស៊ាន-៩ បូកបញ្ជូលជាមួយនឹងប្រទេសកម្ពុជា ដែលបានចូលជាសមាជិកនៅថ្ងៃ ៣០ មេសា ១៩៩៩ ។

· ប្រទេសCLMV ៖ គឺជាឈ្មោះដែលគេប្រើសំដៅប្រទេសថ្មិទាំងបួន គឺប្រទេសកម្ពុជា ប្រទេសឡាវ ប្រទេសភូមា និងប្រទេសវៀតណាម។

ដោយ៖ វុទ្ធី