និស្សិតខ្មែរនៅជប៉ុនចែករំលែក ពីបទពិសោធន៏

និស្សិតខ្មែរនៅជប៉ុនចែករំលែក បទពិសោធន៏

ថ្ងៃនេះយើងខ្ញុំ នឹងលើកយក និស្សិតខ្មែរម្នាក់ដែលបានជាប់អាហារូបករណ៏ទៅសិក្សានៅប្រទេសជប៉ុនមកចែករំលែកបទពិសោធន៏ដែលធ្វើឲ្យគាត់អាចទទួលបានអាហារូបករណ៏ទៅសិក្សានៅទីនោះ។

សាន រិទ្ធិសាក់ ជានិស្សិតក្រីក្រម្នាក់ដែលបានចាកចេញពីស្រុកកំណើត មកបន្តការសិក្សានៅទីក្រុងភ្នំពេញ។ ដោយគាត់ជាសិស្សពូកែម្នាក់នៅវិទ្យាល័យ រិទ្ធីសាក់ បានប្រឡងចូលវិទ្យាស្ថានបច្ចេកវិទ្យាកម្ពុជាបានដោយជោគជ័យ។ ក្នុងអំឡុងពេលដែល រិទ្ធិសាក់ កំពុងសិក្សាក្នុងឆ្នាំមូលដ្ឋាន គាត់បានដាក់ពាក្យប្រឡងអាហារូបរណ៏ដើម្បីទៅសិក្សានៅប្រទេសជប៉ុន។ រិទ្ធិ សាក់ បានខិតខំព្យាយាមរហូតដល់ជុំទី ៣ តែជាអកុសលគាត់បានធ្លាក់នៅជុំនោះ។

សាក់ បានព្យាយាមដាក់អាហារូបករណ៏នោះម្តងទៀត នៅឆ្នាំបន្ទាប់។ ដោយសេចក្តីព្យាយាម និង ការខិតខំប្រឹងប្រែងជាងមុន ធ្វើឲ្យ រិទ្ធិ សាក់ជាប់អាហារូបករណ៏ទៅសិក្សានៅជប៉ុន ដូចក្តីរំពឹងទុក។ រិទ្ធិសាក់និយាយថា៖

“ការប្រឡងលើកទីមួយខ្ញុំមិនសូវជាប្រឹងប្រែងឲ្យខ្លាំងនោះទេ ។ លើកទីមួយហ្នឹង ខ្ញុំធ្វើខុសច្រើន ដូចជាប្រគល់ឯកសារទៅស្ថានទូតយឺតយ៉ាវ។ ប៉ុន្តែលើកទីពីរនេះ ខ្ញុំប្រាប់ខ្លួនឯងថា ខ្ញុំត្រូវតែជាប់នៅឆ្នាំនេះ។ ដូច្នេះខ្ញុំព្យាយាមសិក្សាដើម្បីយកពិន្ទុល្អ ក្នុងពេលប្រលងសរសេរ។ ជាលទ្ធផលក្រោយការប្រឡងចប់ ខ្ញុំមានសង្ឃឹមថាខ្ញុំនឹងជាប់ក្នុងជុំទីមួយនេះ។ បន្ទាប់មកខ្ញុំសិក្សាពីកំហុសដែលខ្ញុំធ្វេសប្រហែលកាលប្រឡងឆ្នាំមុន។ វាធ្វើឲ្យខ្ញុំមានការត្រៀមខ្លួនបានល្អជាងមុន។ អ្វីដែលសំខាន់បំផុតគឺខ្ញុំជឿជាក់លើខ្លួនឯង ហើយទាក់ទងទៅរៀមច្បងដើម្បីសុំយោបល់ពីពួកគាត់។ ម្យ៉ាងទៀតខ្ញុំគិតថា ការបំពេញបែបបទក៏សំខាន់ដែរ ព្រោះគេនឹងពិនិត្យមើលថា យើងចង់រៀនអ្វី ហេតុអ្វីបានជាយើងជ្រើសរើសយកប្រទេសជប៉ុន ហើយមិនមែនជាប្រទេសដទៃ?”

បច្ចុប្បន្ន រិទ្ធិ សាក់ កំពុង សិក្សាភាសាជប៉ុននៅទីក្រុងត្យូក្យូ។ ឆ្នាំក្រោយគាត់នឹងចាប់យកជំនាញ វិស្វករគីមីនៅ Wakayama National College។