ចង់បានអាយុវែង គួរអនុវត្តនូវវិធី ទាំង៧ យ៉ាង ខាងក្រោម

ចង់បានអាយុវែង គួរអនុវត្តនូវវិធី ទាំង៧ យ៉ាង ខាងក្រោម

 

១. សប្បាយការី 

ចេះធ្វើសេចក្តី សប្បាយឲ្យដល់ខ្លួនឯង គឺអនុវត្តទៅតាមក្បួនអនាម័យ និងក្បួនសុខភាព។​ ដូចជាឥរិយាបថទាំង៤​ គឺ ដេក ដើរ ឈរ អង្គុយ ត្រូវផ្លាស់ប្តូរឲ្យបានសមរម្យ មានការហាត់ប្រាណបញ្ជេញកម្លាំង សំអាតខ្លួនប្រាណ។ល។

២. សប្បាយេ​ មតញ្ញូ

​មានប្រមាណ ស្គាល់ល្មម ស្គាល់ប្រមាណនៅក្នុងរបស់សប្បាយទាំងឡាយ ដូចជាមិនបរិភោគរហូតដល់ទៅហល់ មើសម្លឹងទូរទស្សន៍ រហូត់ដល់ព្រិលភ្នែក ហៀរទឹកភ្នែក ផឹករហូត់ដល់គ្រើចេញមកវិញ។​ មិនគួរបរិភោគដូចជា ស្រា បារី កញ្ឆា ជាដើមនេះ សុទ្ធតែរបស់នាំទោសដល់ខ្លួន។

៣. បរិណតភោជី   

បរិភោគណាដែលរលាយ ងាយក្រពះស្រួលកិន មិននាំឲ្យខួចក្រពះ និងទំពារឲ្យបានម៉ដ្ឋល្អ។

៤. កាលចារី ​​​ 

ស្គាល់ពេលវេលាក្នុងការធ្វើការ ធ្វើត្រូវសមពេលធ្វើមានពេល មានវេលា ស្គាល់ថាគួរធ្វើការប៉ុន្មានម៉ោង សំរាកកាយប៉ុន្មានម៉ោង រៀនសូត្រប៉ុន្មានម៉ោងជាដើម។

៥. ព្រហ្មចារី ​​​ 

ប្រព្រឹត្តព្រហ្មចរិយធម៌ អ្នកដែលជាគ្រហស្ថ ត្រូវចេះកំណត់កាមារម្មណ៍របស់ខ្លួន ត្រូវវៀរចាកនូវសេពសន្ថវៈខ្លះ ព្រោះអ្នកល្មោភក្នុងកាមគុណពេក នាំឲ្យបាក់កម្លាំង។

៦. សីលវា

មានសីល ប្រព្រឹត្តល្អ មិនធ្វើអ្វីៗដែលខុស។

៧. កល្យាណមិត្ត

មានកល្យាណមិត្ត មិត្តល្អ មិត្តដែលមិនបបួលទៅរកអបាយមុខទាំង​ ៤​ គឺ ស្រី ស្រា ល្បែង អំពើពាលា។

ដោយ៖ ស៊ិង សុង