សាមគ្គីអង្រ្កង

សាមគ្គីអង្រ្កង

អង្ក្រងចងជាមិត្ត​ជាពួកក្រុម                     រួមផ្តុំសាមគ្គីទីត្រង់ណា​​​                

ធ្វើជាសម្រុក​ ទុករក្សា                            ពងពេញត្រៀបត្រាភ្ញាស់បំបែក។

កកើតជាកូន​ពូនជាចៅ                           បានជាញាតិផៅ ច្រើនអនែក                    ​​    

រាយគ្នាយាមល្បាត​ ចាត់ចែងចែក              គ្រប់បែបសារពើ ឈើលំនៅ។

ប្រុងប្រៀបយាមល្បាត ទាំងយប់ថ្ងៃ            ក្រែងខ្មាំងចង្រៃ ចិត្តឃោរឃៅ                  

 រំលោភរុករានពានចូលទៅ                      ជិះជាន់លំនៅរបស់វា។

កាលណាបែកឈើ រងើ្គភ្លាម                     វាឥតទីទាម ឥតរុញរា                    ​​           

កេណ្ឌពលប្រញប់ឆាប់ស្ទុះស្ទា                  ពុះពារតតាំង ប្រឆាំងតប។

បញ្ចេញចង្កូម គួទ ងស្ទើត                       ភ្នែកស្លោស្លន់ស្លើត អើតរហប

សន្ទុះទឹចិត្ត ឥតញ៉បញ៉ប                         ប្រុងប្របប្រយុទ្ធ​ហុតស៊ីសាច់។

អ្នកស្រែចំការណា​ ក៏ដឹង                        កាលខ្លួនខំប្រឹងយ៉ាងប្តូរផ្តាច់                              

 ឡើងបេះអ្វីៗជាចាំបាច់                         វិះៗប្រកាច់ ពីចុងឈើ។

អង្រ្កងព្រួតគ្នាទាំង រយពាន់                    ខាំបោសមិនទាន់ ភាន់ងីងើ                               

អាខ្លះខាំភ្នែក ជ្រែកល្វើងលើ                   អាខ្លះរុករើ ខាងល្វែងក្រោម។

ខាំហើយនោមដាក់ ចាក់ចូលភ្នែក            កនយើងប្រឹងស្រែក ជិតលិចនោម

អៃយះ អៃយ៉ូយ អង្រ្កងចោម                   ព័ទ្ធឡោមជុំជិត រឹតខាំខ្លាំង។

បោសច្បូតសម្លាប់ អស់ពួកមុន​​​                ពូកក្រោយទ្វេគុណ ថែមកម្លាំង

រាប់រយពាន់មុឺន ចូលតតាំង                    ប្រឆាំងខំខាំ ចាំព្រួតគ្នា។

ណាដែលងាប់មុន ក៏ងាប់ចុះ                   ណាដែលនៅរស់ឥតរុញរា

សង្រឹ្គតស្រុះស្រ បន្តគ្នា                          ប្តូរផ្តាច់ពុះពារ ច្បាំងយកជ័យ។

នេះគឺសាមគ្គី សត្វអង្ក្រង                        សាមគ្គីហ្មត់ហ្មង ចងមានន័ួយ

ទុកជាតម្រាប់ ច្បាប់ប្រពៃ                       មនុស្សលោកគួរលៃ គៃគិតចុះ។

ដោយ៖ ញូង សឿន