កក្តា៣យ៉ាងប្រាប់ពីជោគវាសនាអនាគតអ្នក

សូចនាករ៣យ៉ាងប្រាប់ពីជោគវាសនាអនាគតអ្នក

យោងតាមការសិក្សាស្រាវជា្រវរបស់ខ្ញុំកន្លងមកខ្ញុំអាចសន្និដ្ឋានថាមានកត្តា៣យ៉ាងដើម្បីបង្ហាញថា ជោគវាសនាអនាគតរបស់អ្នកជានរណា? ក្លាយទៅជាអ្វី? ជាសហគ្រិន ជាអ្នកនយោបាយ អ្នកជំនួញ ជាមហាសេដ្ឋី។ល។ តើកត្តាទាំងនោះមានអ្វីខ្លះ?

ខ្ញុំសង្ឃឹមថាអ្វីដែលដែលខ្ញុំបកស្រាយខាងក្រោមនេះជាគំនិតជាព័ត៌មានក៏ដូចជាចំណេះដឹងដ៏តូចស្តូចស្តើងចំពោះមិត្តអ្នកអាននិងបងប្អូនជនរួមជាតិដើម្បីយកទៅគិតពិចារណាក្នុងការកែប្រែជោគវាសនារបស់អ្នកនាថ្ងៃអនាគតបាន។ រូបខ្ញុំផ្ទាល់សូមធ្វើអះអាងថា នេះគឺជាការយល់ឃើញរបស់ខ្ញុំ វាអាចខុស ឬអាចត្រូវ តែអ្វីដែលសំខាន់សូមអស់លោកអ្នក ធ្វើការពិសោធន៍ និងធ្វើការសង្គេតលើខ្លួនអ្នកផ្ទាល់។

១-ការផ្លស់ប្តូរផ្នត់គំនិត(Changing Mindset)

បើតាមវចនានុក្រម Cambridge Dictionary បានឲ្យន័យផ្នត់គំនិត(Mindset) គឺជារបៀបនៃការគិតនិងយោបល់ មតិឬការយល់ឃើញរបស់មនុស្ស។ តើផ្នត់គំនិតកើតមកពីអ្វី? ផ្នត់គំនិតនេះកើតមកពីទម្លាប់នៃការគិតនិងប្រតិកម្មតបដដែលៗជាមួយចិត្តហើយវាបានកប់ជ្រៅខ្លាំងមែនទែនចូលទៅក្នុងចិត្ត បង្កើតជាផ្នត់គំនិតនេះឯង។ ដូច្នេះ ដើម្បី ធ្វើការផ្លាស់ប្តូរគំនិតយើងត្រូវតែប្តូរការគិតយើងសិន ជាដំបូងបង្អស់ក្នុងការប្រែក្លាយខ្លួនអ្នកជាមនុស្សថ្មីទៀតដែលអ្នកចង់ក្លាយជា។​ ដូចពាក្យមួយឃ្លាបានពោលថា ការគិតរបស់អ្នកនឹងបញ្ជាក់ពីអនាគត់របស់អ្នក ប្រៀបដូចជាគ្រាប់រុក្ខជាតិដែលដុះលេចរូបរាងចេញមកនោះគឺអាស្រ័យដោយគ្រាប់វា ហើយវាមិនអាចដុះដោយអត់គ្រាប់នោះទេ។យ៉ាងណាមិញរាល់ទង្វើរាល់សកម្មភាពដែលយើងម្នាក់ៗប្រព្រឹត្តស្តែងចេញតាមរយៈសកម្មភាពខាងក្រៅនោះគឺបានមកពីការលាក់បាំងទុកនៅក្នុងចិត្ត​ បេះដូង របស់យើងនោះឯង  ហើយយើងមិនអាចលាក់បាំងអត្តចរឹតពិតរបស់យើងបានទេ។ ដូច្នោះបើអ្នកស្រឡាញ់របស់អ្វី ឬចង់ក្លាយខ្លួនជាអ្វីនាពេលអនាគតនោះចូរប្តូរការគិតរបស់អ្នកភ្លាម ហើយចូរអ្នកគិតស្រមៃពីអ្វីដែលអ្នកចង់ក្លាយជានោះបន្ទាប់មកវាបញ្ជូនចូលទៅកាន់អនុសម្បជញ្ញៈ(Subconscious Mind)ហើយវាបានបញ្ជូនព័ត៌មានទិន្នន័យទាំងឡាយ(ទាំងល្អទាំងអាក្រក់) ដែលអ្នកបានគិតនោះចូលទៅក្នុងឃ្លាំងខួរក្បាលបន្ទាប់មកទៀតវាបង្កើតឲ្យធ្វើសកម្មភាពមកខាងក្រៅ។ ត្រង់ចំនុចនេះខ្ញុំសូមធ្វើគូសវាស់ទាក់ទងនឹងច្បាប់នៃការស្រូបទាញ(Law of Attraction)ផងចុះ ពីព្រោះវាជាច្បាប់ធម្មជាតិវាប្រៀបដូចច្បាប់ទំនាញផែនដីអីញ្ចឹងបើយើងជឿឬមិនជឿវាទាញទៅក្រោមទាំងអស់។ ច្បាប់នៃការស្រូបទាញបានចែងថា ជីវិតស្រូបទាញរកជីវិតដូចគ្នា(life attracts life)។ នៅពេលដែលយើងគិតពីអ្វីមួយយ៉ាងជាក់ច្បាស់នោះវាបានស្រូបទាញមករកយើងពីអ្វីដែលយើងបានគិតមកជាក់ជាមិនខាន។ ដូចគ្នាដែរ ទាក់ទងនិងចិត្តនេះដែលមានវិសាលភាពធំធេង ដើម្បីផ្លាស់ប្រែជោគវាសនារបស់យើង ទៀតសោត ព្រះសម្មាសម្ពុទ្ធទ្រង់ត្រាស់ថាៈ

មនោបុព្វង្គមា ធម្មា មនោសេដ្ឋា មនោមយា, មនសា ចេ បទុដ្ឋេន ភាសតិវា ករោតិ វា,
តតោ នំ ទុក្ខមន្វេតិ ចក្កំវ វហតោ បទំ ។

ប្រែថាៈ ធម៌ទាំងឡាយមានចិត្តជាធំ មានចិត្តប្រសើរបំផុត សម្រេចមកពីចិត្ត បើបុគ្គលមាន
ចិត្តត្រូវទោសៈប្រទូសរ៉ាយហើយ ទោះនិយាយក្តី ធ្វើក្តី (ក៏អាក្រក់ដែរ), ព្រោះអំពើអាក្រក់
នោះឯងហើយសេចក្តីទុក្ខរមែងដេញជាប់តាមក្រោយបុគ្គលនោះ ដូចជាកង់រទេះវិលតាម
ស្នាម​ជើងគោដែលអូសនឹមរទេះ យ៉ាងដូច្នោះឯង ។

មនោបុព្វង្គមា ធម្មា មនោសេដ្ឋា មនោមយា, មនសា ចេ បទុដ្ឋេន ភាសតិវា ករោតិ វា, តតោ នំ សុខមន្វេតិ ឆាយាវ អនុបាយិនី។

ប្រែថាៈ ធម៌ទាំងឡាយមានចិត្តជាធំ មានចិត្តប្រសើរបំផុត សម្រេចមកពីចិត្ត បើបុគ្គលមាន
ចិត្តជ្រះថ្លាហើយ ទោះនិយាយក្តី ធ្វើក្តី (ក៏ល្អទាំងអស់), ព្រោះចិត្តជ្រះថ្លានោះឯង សេចក្តី
សុខរមែងតាមជាប់បុគ្គលនោះដូចស្រមោលដែលអន្ទោលតាមប្រាណ យ៉ាងដូច្នោះឯង។

២-ទាក់ទងនិងការសេពគប់ឬមជ្ឍដ្ឋានជុំវិញ

ដើម្បីដឹងថាអ្នកជាបុគ្គលមានអត្តចរឹតយ៉ាងណា ហើយនឹងក្លាយជាបុគ្គលណាមួយនាពេលអនាគត នោះចូរអ្នកមើលមនុស្ស៦នាក់ដែលអ្នកសេពគប់ឬដើរជាមួយ។ បុគ្គល៦នាក់អាចប្រាប់អ្នកជាមនុស្សប្រភេទណា បើអ្នកដើរជាមួយអ្នករកស៊ីឬអ្នកធ្វើអាជីវកម្ម នោះអ្នកនឹងក្លាយជាអ្នករកស៊ីជាក់ជាមិនខាន។ បើអ្នកចំណាយពេលជាច្រើនដើរ ឬសេពគប់អ្នកនយោបាយនោះអ្នកនឹងក្លាយជាអ្នកនយោបាយនាពេលអនាគតហើយបើអ្នកដើរជាមួយមហាសេដ្ឋីអ្នកអាចនឹងក្លាយជាមហាសេដ្ឋីដែរ។ តែបើអ្នកសេពគប់ជាមួយបុគ្គលពាល អ្នកក្រ អ្នកខ្ជះខ្ជាយពេលវេលា អ្នកគិតអវិជ្ជមាន នោះអ្នកនឹងក្លាយជាបុគ្គលទាំងអស់នោះជាក់ជាមិនខាន។ម្យ៉ាងទៀតអ្នកនឹងក្លាយជាបុគ្គលណាមួយនាពេលអនាគតវាអាស្រ័យលើមជ្ឈដ្ឋាននៅជុំវិញខ្លួនអ្នក និងវាអាស្រ័យលើ សៀវភៅដែលអ្នកបានអាន ព័ត៌មានដែលអ្នកបានបញ្ចូល(ទាំងល្អនិងអាក្រក់) វីដេអូដែលអ្នកមើលបទចម្រៀងដែលអ្នកស្តាប់។ល។ទាំងអស់នេះសុទ្ធតែកត្តារួមចំណែកក្នុងការកែប្រែជោគវាសនារបស់អ្នកទាំងអស់។ ដូច្នោះចូរអ្នកប្រយ័ត្នក្នងបញ្ចូលនៅព័ត៌មានមិនល្អដែលនាំឲ្យអ្នកទៅកាន់ផ្លូវបរាជ័យ។

៣-ទាក់ទងសកម្មភាពដែលអ្នកកំពុងធ្វើរាល់ថ្ងៃ

ដើមរុក្ខជាតិដែលអ្នកដាំនៅថ្ងៃនេះ វាអាចផ្តល់ផលឲ្យនៅថ្ងៃខាងមុខ យ៉ាងណាមិញ រាល់សកម្មភាពដែលអ្នកបានធ្វើនៅថ្ងៃនេះជួនវានឹងឲ្យផលនៅថ្ងៃនេះឬក៍ខ្លះទៀតវានឹងឲ្យផលនៅថ្ងៃខាងមុខ។ ជោគជ័យនិងបរាជ័យមិនមែនកើតឡើងដោយចៃដន្យទេអ្វីៗសុទ្ធតែបានព្រៀងទុកទាំងអស់ពេលខ្លះដោយផ្ទាល់ ពេលខ្លះដោយប្រយោល ហើយវាកើតឡើងដោយសារការខិតខំប្រឹងប្រែងនៅថ្ងៃនេះ។ ​អ្វីៗដែលយើងទទួលបាននៅថ្ងៃនេះវាបានមកពីការខិតខំប្រឹងប្រែងនៅថ្ងៃម្សិលមិញឬក៏ពីអតីតកាលកន្លងមក។ ហើយអ្វីដែលយើងនឹងទទួលបាននូវថ្ងៃស្អែកវាកើតមកពីការធ្វើសកម្មភាពនៃការប្រឹងប្រែងនូវថ្ងៃនេះផ្ទាល់តែម្តង។ ពាក្យចាស់ពោលថា ម្រឹគទាំងឡាយមិនដែលបោលចូលមាត់សីហៈដែលកំពុងដេកលក់នោះទេ យ៉ាងណាមិញ ចំណេះវិជ្ជា ទ្រព្យសម្បត្តិ និងអ្វីដែលយើងចង់បាន ចង់ក្លាយជា មិនមានដល់បុគ្គលទាំងឡាយដែលខ្ជិលច្រអូសនោះទេ។ ទាក់ទងនិងចំនុចនេះដែរ ខ្ញុំសូមលើកយកទ្រឹស្តីកម្មផល(Law of Action and Result or Law of Karma or Law causes and effects) មកស្រាយបញ្ជាក់។ ទាក់ទងនិងទ្រឹស្តីកម្មផលគឺជាមូលដ្ឋានគ្រឹះក្នុងទ្រឹស្តីព្រះពុទ្ធសាសនា ពីព្រោះវាជាច្បាប់ធម្មជាតិវាមិនមែនជាច្បាប់ឬទ្រឹស្តីបែបអបិយជំនឿនោះទេ។ខ្ញុំសូមធ្វើការបកស្រាយដោយសង្ខេប។​ទ្រឹស្តីកម្មផលបានចែងថាបុគ្គលព្រោះសាបពូជបែបណារមែងបានផលនោះ ( what we sow is what we reap)។ កម្មមានពីរគឺ​ កុសលកម្ម និងអកុសលកម្ម។ កម្មដែលយើងបានធ្វើ វាអាចហុចផលឲ្យនាពេលបច្ចុប្បន្ន និងខ្លះទៀតវាហុចផលឲ្យនាពេលអនាគត។ ឧបមាថា ឥលូវនេះ អ្នកជាអ្នកក្រ តែនាពេលបច្ចុប្បន្ននេះអ្នកបានធ្វើកម្មល្អ ដូចជាខិតខំធ្វើការ ខិតខំរកស៊ីយ៉ាងដុតដៃដុតជើងគ្មានពេលសម្រាកជាដើម។ល។ នោះផលដែលផ្តល់ឲ្យនាពេលអនាគតគឺអ្នកនឹងក្លាយជាអ្នកមានបានជាមហាសេដ្ឋីជាអ្នកជោគជ័យជាដើម។

សរុមរួមមកមានកត្តា៣យ៉ាងនេះដែលអ្នកអាចកំណត់ជោគវាសនារបស់អ្នកបានចូរកុំជឿលើព្រហ្មលិខិតអី ចូរជឿលើសមត្ថភាពរបស់យើង ហើយកំណត់ថាអ្វីដែលអ្នកចង់បានក្នុងជីវិត។

អរគុណចំពោះការគាំទ្រ និងពាក្យរិះគន់ទាំងឡាយ!!!

ដោយ៖ ស៊ិង សុង

.