យុវវ័យគួរយល់ដឹង៖ ការស្រមើស្រមៃពីដៃគូ

ជាទូទៅ ការស្រមើស្រមៃពីដៃគូរបស់មនុស្សម្នាក់ៗ មានលក្ខណៈខុសៗគ្នា ជាពិសេសការស្រមើស្រមៃរបស់ភេទផ្ទុយគ្នា។ ដូចនេះដើម្បីដឹងពីតម្រូវការ និង ការស្រមើស្រមៃរបស់ភេទផ្ទុយគ្នា ចាំបាច់យើងម្នាក់ៗពិភាក្សាគ្នា។

លើសពីនេះទៅទៀត ការស្រមើស្រមៃពីដៃគូរបស់ខ្លួន មានលក្ខណៈខុសគ្នានៅពេលយើងគិតភ្លាមនិងគិតទៅថ្ងៃអនាគត។ ការស្រមើស្រមៃពីដែគូលើកដំបូង គឺវាចេញពីធម្មជាតិរបស់មនុស្ស។ ជាទូទៅបុរសនៅពេលគិតភ្លាមៗលើការស្រមើស្រមៃពីដៃគូរបស់គេ គឺគេគិតពីអ្វីដែលទាក់ទាញឲ្យមានការរួមភេទ ដើម្បីបន្តជីវិតដូចជា ស្អាត រាងស្វែល ស៊ិចស៊ី...។ ចំណែកស្ត្រីវិញ ជាទូទៅការគិតភ្លាមៗទៅលើការស្រមើស្រមៃពីដៃគូ គឺគិតពីចំណុចដែលអាចការពារគាត់បានដូចជា មាឌធំ ខ្ពស់ សង្ហា កម្លាំងរឹងមាំ ដឹងទុក្ខធុរៈ...។ វាមានសារៈសំខាន់ដែលយើងគួរដឹងថា ចំណុចភាគច្រើនដែលយើងស្រមើស្រមៃចង់បានពីដៃគូតាមរយៈការគិតភ្លាមៗនោះ វាអាចមិនស្ថិតស្ថេរពេញមួយជីវិតនោះទេ។

ការស្រមើស្រមៃពីដៃគូដែលផ្តោតទៅលើភាពវៃឆ្លាត ការគិតពិចារណា និងអាកប្បកិរិយាគឺជួយឲ្យមានទំនាក់ទំនងយូរអង្វែង។ ប្រសិនបើយើងបានសរសេរបញ្ជីនៃការស្រមើស្រមៃគូ ដែលមានលក្ខណៈយូរអង្វែងសម្រាប់ខ្លួននោះ វាជួយឲ្យយើងអាចបង្កើតទំនាក់ទំនង យូរអង្វែងជាមួយនឹងយើង។

ប្រភព៖ Karol & Setha